اللى بيحافظ على علاقتك بأي شيء في الدنيا هو التساهل أو التسامح أو التغافل اللي بيدي لأي من الطرفين مساحة حرية تخلي الروح زي ما كانت في أول يوم للعلاقة دي..
كلنا بنغلط بنتعصب بنترفز.. كلنا بنكون عايزين كل حاجة نفسنا فيها ونفسنا الشخص اللى قدامنا يقدر ده.. كلنا بندور على اللي يفهم امتى محتاجين مساحة الحرية، وامتى محتاجين مساحة الصراحة وامتى محتاجين نحس بشوية غيرة أو مانحسش بها خالص..
اللي بيحب حد لدرجة هو مش عارف يحددها العملية بتوسع منه فما بيكنش قادر يحدد هل هو بيحب ولا بيحب يمتلك؟
هل هو عايز نفس الشخص بنفس الحيوية والعفوية اللى شفها في بداية العلاقة وشدته واللى مصدرها بالتأكيد الزحمة والاختلاف والعلاقات والناس؟ ولا هو عايز الشخص اللي هيشكله على ايده فهيكون ملك الدنيا ومافيها "هكذا بيعتقد".
الدنيا بتوسع لدرجة إننا بنبدأ نضيق الخندق على بعض ونخنق في بعض، لدرجة إننا بننسى إن البداية في العلاقة كانت البراح اللى بنحسه في كلمة ولا همسة ولا لمسة مش مقصودة.
العفوية بتموت كل يوم عن اللي قبله في قلبك، لما بيبدأ يدخل فيه حب الامتلاك وتبدأ روح التكيف اللى جواك تطلع.. صحيح الإنسان قادر يتكيف على البيئة المحيطة به بس ده لإنه يمتلك العقل.. اللى بيحط القواعد المسببه لمتعته مش أذيته "المفروض".
عمرك ما هتعرف تتكييف في علاقة عايزها عفوية وأنت بايع عقلك وعايزه يفضل جوا الكهف بتاعك فقط ولا يخرج منه، وأنت بايعه لشيطان نفسك الآناني اللى عايز كل حاجة ليه لوحده..
عمرك ما هتحس بقيمة الأشياء.. وأنت مش بتفكر فيها أنت بتفكر بس إزاي تحصل عليها وتخبيها في دولابك!!
زمان قالوا حب بعقلك وفكر بقلبك!..
بس أحنا ما بنحبش الأمثال الشعبية.. فخلي عقلك يطيب خاطرك في الفشل!
تعليقات
إرسال تعليق