في رواية مش كاملة لروبير موزيل اسمها "L’homme sans qualités" " أو إنسان بلا صفات".
الرواية بتحكي قصة ولد فشل في إيجاد معنى لحياته لأنه كان بيحلل كل حاجة لدرجة السلبية، واللامبالاة والنسبية الأخلاقية، للدرجة للى خلت ردود فعله مرتبطة بالوسط الخارجي.
البطل فى الرواية من كتر ما بيحلل كل حاجة أصبح بلا قيم ولا هدف ولا معتقد، حتى إنه مش عارف يختار مهنة معينة، مابقاش عنده حتى القدرة على ده، الولد كان بيقول فى الرواية، "عندَما تكون لدينَا القدرة على فعل أي شيء نريده، لا تصبح لدينَا رغبة في فعل أي شيء".
سارتر كان بيقول إن الحرية بتخلي الإنسان مسؤول بمعنى، إنه باختياره بيكون مسؤول عن كل البشرية باختياره ده سواء بقا كان خير ولا شر.. ولما كان بيتكلم عن الوجودية فكان بيقول:
" فإذا كان الوجود يسبق حقيقة الجوهر فالإنسان إذن مسؤول عما هو كائن، فأول ما تسعى إليه الوجودية هي أن تضع الإنسان بوجه حقيقته، أن تحمله من ثم المسؤولية الكاملة لوجوده، وعندما نقول إن الإنسان مسؤول عن نفسه لا نعني أن الإنسان مسؤول عن وجوده الفردي فحسب، بل هو بالحقيقة مسؤول عن جميع الناس وكل البشر".
ومن هنا أنا بقول إن العشوائية وعدم التخطيط بيخليك تشوف الدنيا بشكل حلو وبيخلولك تحس إن ما فيش أحسن من كدا فى الدنيا عيشة بس لما بيمر الوقت عليك بتحس إن اللى أنت بتعمله مالوش نتيجة ولا ليه مردود ومن هنا تبدأ تفكر فى الحياة وتبص على نفسك من بره وعلى الناس اللى حواليك.. من هنا بتبدأ تفكر فى اختيارك وتحس بنتيجته على البشرية المقننة في الناس اللى حواليك، من هنا بتبدأ تسأل نفسك سؤال واحد بس هو أنا كنت صح بأنانيتي واختياراتي العشوائية؟..
وتيجي الإجابة بإننا نبدأ بقا نخطط لبكرة على أساس إنه هيجي أفضل من أمبارح ونقول خلاص هنفذ.. بس بكرة بيجر بعده بيجر بعده وبنفضل فى الدايرة دي لفترة كبيرة، مع إن الخطة واضحة بس اللى مش واضحلنا هو إن روح العشوائية تملكتنا وتملكنا الشعور الزائف بالحرية اللى بنحس بيه.
حرية مزيفة ما كنش ليها طعم حرية كدا زي اللى كان بيتكلم عنها ماثيو بطل رواية دروب الحرية اللي كتبها سارتر لما قال "أني لست شيئاً وليس لدي شيء … أنني خارج الماضي، خارج نفسي إن الحرية هي المنفي، وأنني مقضيّ علي بأن أكون حراً"
هنا الحرية قضت على بطل الرواية.. وفي الواقع العشوائية قضت على الروح الحلوة اللى ممكن تكون كانت عايشة جوانا، الروح اللى كانت فى وقت من الأوقات بتحركنا للحب والكره والتجربة والفكر والفهم، للخيانة والأمانة لليأس... باختصار هي اللى كانت بتحركنا للحياة .. بس عشوائيتك الأولى قضت على حياتك التالية.. ومن هنا كانت المأساة الحقيقة اللى بتتحمل نتيجتها! سواء قبلت أو رفضت!
#أهو_كله_كلام
تعليقات
إرسال تعليق