بقالى كتير معلقتش على أي حاجة بتحصل فى البلد، الحقيقة جربت إني اعيش معزولة، بس وانا ايه اللى بأيدي، أنا أصلا بطبيعتى كائن فضولى ،زي فضولى بتاع مجلة ماجد كدا فكرينه ... ماعلينا
المهم بقا يا أصديقائي الحلوين انى بعد ماحاولت بشدة ضبت النفس فشلت فى انى اسمع كلام الحكومة، وقررت ارد بفوضى على الفوضى اللى بتحصل فى البلد وعشان كدا كتبت إستيت صغير على حسابي الشخصى على الفيس بوك طبعا مكنتش هاعرف أكتب على صفحتى لأنها بتاخد شوية شكل الشغل وطبعا انتواعارفين الحاجات الرسمية بتكون مملة شوية :) ماعلينا بردوا .
المهم اني بعد ما نشرت التعليق إياه اللى قولتلكم عليه من شوية فى حد كمان حط عليه تعليق وسألني شوية أسأله عجيبة معتقدش إن فى منا كتير فاهمها وإلا مكنش حد سألها:
" بصراحة انا كل اللى شايف انه بيحصل ان شويه همج عوزين خراب والدفاع بقا ماسخ اي حاجة ،ما تفهمينى كدا اللى فى ميدان سيمون بوليفار دول بيعملوا ايه ولا اللى عوزين يدخلوا الفندق دول مين وعيزين يدخلوا ليه بلاش دول ، هل إقتحام بورسعيد ده كان عادي وقشطة ال يدخل يدخل و ال يطلع يطلع مثلا ولا هو هجوم لمجرد الهجوم وخلاص "
فى حاجات بتحصل فى البلد بيكون تعليقك عليها no comment زي :
1- أنضمام حزب النور لجبهة الانقاذ ... ماهو كله بيلحس كلامه الايام دي
2- تصريح وزير العدل بان المظاهرات لازملها تصريح من قبل 5 ايام .. اصل الثورة قامت عشان جنابك يطل علينا بتصاريحه الذكية
3- مرسي.. يسيب البلد تاكل فى بعض اربع أيام ويطلع يرد علينا مش هاخد أي
إجراءات إستثنائية أمال حظر التجول اللى انت هببته ده ايه إجراءات منع
الحمل مثلاَ
4- الداخلية تبنى صور جديد حول منطقة شبرد وسمراميس
ده على أساس ان البلد كلها مبقتش سجن مثلا ولا على أساس انكوا خايفين على
الجنود الغلابة اللى بتقع بسبب تخلفكم
5- مشروع قانون التظاهر
يمنح «الداخلية» حق استخدام الخرطوش .. ويجرّم ارتداء الأقنعة .... بالمرة
متنسوش النظرات والطاقيات وكمان اي قناع غاز من اللى بتسموا بدنا بيه على
صباح ربنا
6- قال ايه الشاطر بيمنع قيادات الاخوان من التصريحات الاعلامية ده على أساس ان مالطا لسة فيها حتى مخربتش
7- الاعلام بيتعامل مع مرسي زي ما اتعامل مع مبارك فى ايامه القديمة ده
على أساس ان بقا في فرق بنهم الاتنين فى ايدهم دم والاتنين اهالينا فى
البيوت لسه بتقولنا .... وهو ماله هو مش مسئول
8- إسرائيل ضربت
مركز أبحاث بالقرب من العاصمة السورية دمشق .. على أساس انها كانت ناقصة
اللى جايبنكم انتوا كمان مش كفاية عليهم السفاح اللى جوا ... وسلملى على
العالم بحربه العالمية التالتة ... قولنا نروح المريخ مقتنعتوش :P
9- تجدد الاشتباكات فى محيط قصر النيل على أساس انكم فكرين انها هتقف بتصريحاتكم الغبية
أخيرا رحم الله مصر من غباء بعض أهلها ...
تعليقات
إرسال تعليق