نقطة حمرا

يا نقطة حمرا.. على ورقة بيضة في قلب كراس الغلام
يا نقطة حمرا اترسمتي بالآلم ..
والدمع من حد معدي والسلام

يا نقطة حمرا بقيتي ...بحر...
بحر دم علي شط أهل الهوى والغرام

يانقطة..... آسفة ...
قصدي يا بحر
مد شطه للجوامع والكنايس ....
مد شطه لقلب أم يخطف ابنها...
ويقولها أسف يا ستي...
أصله رآي

يا نقطة كنتي مجرد بداية في كل سطر ....
بقيتي خط أحمر علي كل رأي

يانقطة حمرا...
كفاية مد...
كفاية هد
ده البيوت مش ناقصة يزيد عليها هم حد

آه يانقطة حمرا علي ورقة بيضة كانت بدايتك
ومد بحرك كان الغريق ...
زاد الطريق

كانت آثار وشوش كتير
إستحالة في موج قسوتك
تروح صورهم
من البيوت ....
من القلوب ....

يا نقطة حمرا كفاية مد...
كفاية هد...
كفايه ده البلد مش ناقصة دم حد

نقطة حمرا
كلمات :نوران عارف
27-7-2013