هاتقولي ايه افضل احساس بتعيشه في دايرة علاقتك هاقولك الشوق لما يكون من القلب واللهفة ع وجودك اللي بجد واحساس الناس بالفقد لما تغيب
قبل ما اعمل دي اكتيفيت للفيسبوك مؤقتا عشان بمتحن كنت اتعودت ع شوية حاجات
الاولي أي حد اون لاين الصبح بصبح عليه وبتمني له اليوم يكون حلو وفعلا من قلبي ببهجة مش عارفة بجبها منين بس كنت بقول انا لو عايشة مع ناس في مكان وصحيت الصبح بقول صباح الورد بابتسامة تملا الخد
العادة دي خلتني اتعامل مع الناس من منظور مختلف مش عارفة اشرحه بس هو متعلق بالاحساس
الشاهد من ده اني بعد ما قفلت الفيسبوك الناس اللي معاها رقمي كلمتني ع الواتس اب او بعتتلي مسج وفي اللي اتصل يسأل انتي كويسة !
....
رجعت من السفر اتسحلت في زحمة الشغل مع المذاكرة ما بقتش عارفة ارد ع كل الناس وتيلفوني برقمي الاساسي باظ فده كمان زود الطين بلة.. ..
ناس كتير حاولت تكلمني عليه وما عرفتش توصلي ولا انا عرفت انهم اتصلوا الا بالصدفة غير اللي حاول يوصلي ع طريق حد وده اللي حسسني فعلا ان وجودي ليه لازمة عند البعض
الخلاصة زحمة الشغل وان مش بتعمل حاجة غير تصحى من النوم تنزل تشتغل ترخم ع زمايلك او تقعد صامت وترجع تنام وهكذا دايرة ما بتخلصش بتنسينا ان لينا ناس في حياتنا لو غبنا عنهم هيسألوا يمكن بوست بيطمنهم عليك في زحمة يومك احيانا ويمكن مكالمة او رسالة بلاش نبخل ع بعض بيها
المشكلة ان السبع سنين الاخيرة من حياتي الزحمة دي زادت وعلاقتي بالناس قلت وما بقتش اسأل ع الكل وطبعا الطبيعي اللي كان بيسأل زهق ان المسألة رايح من غير راجع والصراحة حقكم جدا .. وحقكم فوق راسي في القلب لو شفتوا البوست ده
الخلاصة لو جه حد في بالك في لحظة كلمه في الوقت نفسه ما تقولش لما اخلص
كنت ديما بستغل وانسى الفطار جمبي واسيب الشاي لحد ما يبرد ويبقا مالوش طعم
كان عندي حد ديما يقولي ما تنسيش تفطري العمر بيخلص والشغل ما بيخلص ولا يتهد ...
افتكروها واسالوا ع اللي بتحبوهم ما حدش مالك وقته ولو فاكر تقدر تخدع وقتك يبقا انت اللي مخدوع للاسف!
اسفة ع الاطالة
تعليقات
إرسال تعليق