الموسيقى... اشمعني!

في دراسة عظمية مش فاكرة تفاصيلها قالت أن الموسيقي بتأثر بشكل كبير ع البشر زي مثلا إنها هتساعدك تنتج أسرع وتغيير مودك وتخلى الحياة الطف ليك

المهم الفترة اللي قريت فيها الدراسة دي من حوالي ١٠  سنين اكتئبت جدًا، وكانت مشاكلي النفسية بتتفاقم لدرجة إني انعزلت فترة عن الناس ما كنتش بعمل حاجة غير إني قاعدة بلعب مجوهرات ع فيسبوك البتاعة اللي بتجمع فيها مجوهرات فوق بعض نفس اللون وتكسرهم دي 

 الفترة دي اكتشف إنى ما كنتش بسمع موسيقي ولا حاجة؛ بس كنت بحس أن الألعاب ممكن تعمل نفس التأثير بتاع الموسيقى وطبعا كنت غلطانة تماًما لأنها كانت بتزود الاكتئاب، خصوصًا إنها العرب فردية ده عرفته بعدين لما قعدت اقرأ بعد كدا حبة حاجات تانية.

في مرة وأنا في الطريق راجعة إسكندرية في ٢٠١١ يمكن، قابلت البنوتة الحلوة دي Yasmeen Abo Elfutouh  يارب أكون منشنتها صح وقتها قعدت أحكي لها عن سر بسمتي وبهجتي اللي بقيت فيها وقناعتي بالسعادة العظيمة واللي مصدرها فقط إني قررت أكون سعيدة.

وقعدت أحكي عن أد إيه إن قرار السعادة عظيم وسهل وهري كتير كدا، طبعا السعادة مش مجرد قرار لأن عوامل كتير فى الحياة بتأثر على الكلام ده.

اللي  عايزه اقوله إني فى الفترة دى اللى ظهر فيها قرار السعادة، قعدت اسمع مجموعة مزيكا كلها أنا بحبها وكلها أغاني أمل وتفاؤل وكنت بسمعها كل يوم لما أصحى من النوم الصبح وبشكل منتظم وكأنها واجب محبب. 

بعد الضهر أثناء الشغل كنت بسمع سكاي أف أم موسيقى جاز قديمة بحبها وموسيقى بتهدى الأعصاب وبيانو كلاسيك.

عيشت الفترة دي لمدة طويلة كنت بحاول أسمع الناس عشان، بنفس الطريقة اللى بسمع بها الموسيقى، أتعلم كنت بحاول أحب الحياة من منظور الروح اللي في الموسيقى  اللي بختار اسمعها.

الموسيقي خلتني انزل المراكز الثقافية عشان أتعلم حاجات مختلفة واشوف ناس جديدة، أجانب ومصريين الحقيقة ده اللي خلاني سعيدة أكتر بس الموسيقي كانت عامل مهم.

افتكرت أكتب كل الهري ده  لما سمعت كايروكي "أثبت مكانك" وبعدها زاب ثروت "نور" وبعدين يسرا الهواري "ببتسم من كتر حبي في العالم"، يمكن ٢٠ مرة كل أغنية وفعلا ما حستش إني بعيدهم، بعيدًا عن ذكريات الأغانى بس أنا انجزت شغل في ٣ ساعات كنت بسمع فيهم الأغاني دي ما كنتش عارفه انجزه في  ٨ ساعات.

الخلاصة، اسمعوا موسيقى حلوى تساعد ع الحياة مش كلمات أغاني كئيبة جدًا تقفلك منها وتقلل عزيمتك وترجعك مهزوم ومكسور بتعيد في نفس الكلمة "أنا نفسي أعمل، الحال سيء، أنا زهقت".. 

#اهو_كله_كلام