احتمال وارد

في أغنية لسميرة سعيد هي بالنسبة لي في الفترة دي من أفضل ما كتب ولحن نادر عبدالله، اسمها "احتمال وراد".

الاغنية حطت كل الاحتمالات اللى ممكن تكون واللى مش ممكن في أي علاقة حب، وسابت كل حاجة في الحياة وركزت على نقطة واحدة بس وهى الثبات في الحب أو اليقين في الحب...

يمكن نادر عبدالله حب يؤكد على إن الخيالات هتفضل خيالات وإن الواقع هو اللى في الأخر هيستمر، ويكمل معانا وإن الحب في الأخر هيفضل ثابت في كل الحالات الخوف والقلق واليأس والروح المغامرة ...الخ.

وممكن يكون حب يهرب من الواقع بالحب على أساس إنه هو الدنيا العظيمة اللى ملهاش حل واللى لو ركزت في الموسيقى مش هتحس منها بده أبدًا هتحس منها بروح حزينة مسيطرة وكأنها روح الشجن اللى بتسيطر على كل من يحب...

الفكرة إننا لو اتفقنا سوا إن الحب ممكن يكون لشىء أو هدف معين في الحياة وجينا نطبق الأغنية دي عليه هنكتشف إن المعافرة هى الحاجة الوحيدة اللى باقية..

يعني مثلا كان في خطة معينة نفسنا فيها وإنها تتم بشكل أو بأخر لحياتنا وكانت الاحتمالات كلها بتقول إننا يا أما هننسى الخطة ونكمل بطريقة مختلفة يا أما هنبطل خوف ونعافر ويا أما الهدف ده أصلا مش بتاعنا وهيهرب يا أما هنهرب من الحياة وندور على مكان نختفي فيه لأنها مملة، ويمكن نبطل نفكر أو نفضل عاييشين على إنها حمل تقيل معانا، ونرجع تاني للشىء الأكيد في الحياة هو إننا عايزين نكمل في العيشة دي وعايزين نعافر رغم كل الخيالات اللى هى لو طبقت على الواقع هنكتشف إنها حقيقة مرة للأسف.

هنرجع نفتكر إن الحاجة الأكيدة أننا بنحبها في كل الحالات وإلا ما كناش حاولنا فيها ولا عافرنا معاها، الحب موجود في كل أركان حياتنا حتى لو تخلينا عنه أو تغاضينا عن وجوده، حتى لو فكرنا نفرض عليه سور عالى أو نحدده وأو حتى ننفيه، هيفضل موجود في مكان ما في عقلنا اللاواعي، وهنفضل ندور عليه في كلمة ولا فعل ولا حاجة بعيدة عنا، عشان ننسى كل الخيالات من سكات.. ونقول عنها إنها كلها احتمالات بعيدة وإن الحب ينتصر في كل الحالات!

كلمات الأغنية بتقول:

اِحْتِمَالٌ وَارِدٌ وجايز مِنْ النهاردة، أَنْسَى لِيه عَرَفْتِكَ زَمَانٌ وَاِحْتِمَالٌ وَارِدٌ كَمَانْـ إني منسكش في حياتي دقيقة واحدة، واحتمال وارد تبطل خوف عليا، واحتمال متحبنيش وأبقى ليك ومتبقاليش، واحتمال إن أنت تهرب مني ليا

*************

كُلٌّ دي نهايات بِعَيْشِهَا مَعَاكَ سَاعَاتٍ، كُلٌّ دي خيالات بتتنسي مِنْ سكات، كل دي احتمالات بعيدة بس دي الحاجه الأكيدة، ان انا بحبك وانا ف كل الحالات

**************

احتمال وارد وجايز تعتبرني، إني حمل تقيل عليك أو مملة في حبي ليك، واحتمال جايز تبطل تفتكرني، واحتمال وارد نيجي في سنة من السنين، نفترق سوا بإتفاق أو منرضاش بالفراق، واحتمال بعدين نوافق مرغمين