حبة فضفضة (1)

في الفترة اللى فاتت بقيت بعاني من نقص في مجموعة فيتامينات كدا بالتالي بقت نسبة تركيزي اقل بكتير يعني ممكن تقول الحاجة واطلب منك تعيدها كذا مرة لاني مش قادرة استوعب الكلام اللى بتقوله يعني هو مش بيدخل اصلا من البوابة عشان يعدي على مخي ويستوعبه واحيانا كنت بقاوح كتير مع حالي واني فاهمة اللى بيتقال وبالتالي برد ملائم يصلح لكل المواقف.. الكلام ده طبعا مزعج ليا بس انا قعدت اكابر حبة حلوين لحد ما بدأت اكتئب أكتر ما انا اصلا وده وضع طبيعي ومنطقي وبس يا سيدي الحياة بقت سوداء طول الوقت من وجهة نظري بس كالعادة هفضل اضحك وابتسم في وش الجميع عشان تعدي.. اتعلمت ايه من الموقف ده.. اضطراري اني اقرأ الاشياء اكتر من 3 مرات عشان ابدأ استوعبها خلاني ادرك ان الانسان في العادي اصلا مش بيشوف الصورة كاملة مرة واحدة وان كل مرة هتقرأ الاشياء هتلاقي حاجة مختلفة في بازل بيكمل، والصورة بتوضح.. وعلى الرغم انهم علمونا في المنطق في ثانوية عامة ان التسرع في اصدار الأحكام يوقع في خطأ التفكير، إلا إني اكتر واحدة متسرعة ممكن حد يشوفها في حياته، بس اتعلمت كمان من التكرار الاجباري ده ان التسرع نتيجته وحشة وبيخسرك حالك قبل الاشياء المادية والناس.. اتعلمت من الموقف ده ان الصورة ديما فيها اطراف تانية غيري لرؤيتي للطرف التاني مهمة رغم ان ده بقا شي يضايق عشان بقيت اشوف الطرف التاني في حين ان مش دايما الطرف التاني بيشوفني.. معلش محتاج نظارة بقا.. الخلاصة.. مش كل حاجة وحشة بتحصل هي في الاصل وحشة هي الحقيقة عبارة عن مرسال جايلك من الحياة عشان يعلمك حاجة جديدة قبلت اهلا بك رفضت طظ فيك عادي هيعلم غيرك.. #أهو_كله_كلام #حبة_فضفضة