التحرش على طريقة أون ذا ران!


بمناسبة الفيديو بتاع on the run ولا إني فعلا ما كنتش حابة اعلق على الموضوع ده
زمان كانوا بيقولولنا ما تتكلموش مع حد غريب في الشارع ومع ذلك لو حد غريب طلب مساعدة منك ساعده الفكرة اننا اتربينا على مفاهيم مغلوطة وفي منها كتير عكس بعض ولأننا اصلا جيل طلع في أيام ما يعلم بها إلا ربنا خوفنا بيزيد من كل حاجة حاولينا وبنتخبط أكتر..
البنات في الشارع بقت طول الوقت بتسمع كلام مالوش لازمة وقلة أدب وقيمة من اللى يسوى وما يسواش في منهن كتير قرب يبقا شبه البنت اللى قتلت جوزها وعيالها في مسلسل "سجن النسا" من كتر الخوف من المحيط اللى هي عايشة فيه، فيه منهن بردو اخدوا طرق تانية أكثر شجاعة لمواجهة المجتمع بإنهن خرجن من سياق كينوتهن بإنهم بنات مهذبات ذوات صوت راق لبنات مهذبات لكن يملكن لسان أطول منهن وجذمة بتتخلع بسرعة أو صوت عالى بيلم الناس وبياخد الشخص ده على القسم أو بيروحوا مع بنت مش بتعرف تتفاهم فبتضرب في مناطق توجع..
هتلاقي نفس البنات دي ما عندهاش مانع جواها إنها تتعرف على حد جديد في الشارع في محل في أي مكان وهتلاقي مجموعة قليلة بتفرق بين التحرش فعلا ومحاولات الشقط وبين احتمالية النية الصافية واللى بقت نادرة.
من فترة قريبة كان عندي امتحان في الكورس بتاع خلصت شغل وكان قدامي 3 ساعات على ميعاد الكورس، رحت اشتريت أكل ومشيت أكله زي الناس، أول محاولة البعض هيعتبرها معاكسة والبعض هيعتبرها ذوق كانت من صاحب المطعم اللى وبخ العامل عشان ما جبليش كرسى اقعد عليه في الشارع لحد ما يجهز الاكل "ملحوظة العمال كانت بتنضف المكان اصلا وانا اخدت جمب عشان المية".، الراجل قالى عيب انسة زي حضرتك تقف في الشارع وتاكل كدا، بغض النظر عن طريقة الكلام واسلوبه بس انا اعتبرته عادي واحد بيحاول يجذب زبائن لمحله الجديد".
كملت مشي في اليوم ده ولأني مش مركزة غير في الساندوتش عربية طالعة من شارع جانبي كانت هتاخدني بالحضن الاقي حد شكله مش مصرى أوي يعني بيكلمني بالانجليزية خدي بالك، طبعا انا ابتسمت اللى هو عادي وكملت طريقى مع الساندوتش، الولد ده مشى معايا بنفس الشارع وقعد يتكلم معايا على اني اجنبية وانا عادي كملت الحديث لحد ما سألني منين قلتله مصرية، فكان مش مصدق اللى هو لبسك وشكلك ما يقولش كدا بقا وشكلك ليكي في الموضة، اتكلمت مع الولد عادي في اطار شغله اللى هو موضة واطار شغلى اللى كان فيه جزء من الموضة واستأذنت منه ومشيت لما قالي اعزمك على قهوة، ونحكى..
اعتقد نفس الموقف كان هيحصل لو انا بره وكلمني حد واتعرف عليا كنت هتعرف عليه عادي مش هحكي معاه هرفض الحكي طالما الحديث في إطار ناس طبيعية يعني..
الفكرة إني لما بسمع حد جمبي بيعدي وبيعاكس أنا بنفضله ومش بسمع منه وباخد أكشن لو هو تعدا مساحتي الخاصة في الحالة دي هو ونصيبه بقا..
بس الموضوع اللى البنت عملت عليه حوار هي نفسها قالت كان ممكن تقبله لو ما كنش في الشارع مع انه لو في شارع في الشانزليزيه كان هيبقى عادي بردو!!
كان في نقطة في تعريف الامم المتحدة عن التحرش بتقول هو فعل يشعرك بعدم الارتياح أوانعدام الأمان أو الإهانة والإساءة، يعني ببساطة لو الفعل ده تم من حد تعرفه او لأ هيبقا تحرش لو ما كنتش مرتاح له، بس لو نفس الفعل تم وكان فيه قبول ليه يبقا مافيش تحرش بناء ع التعريف.
البنت في الفيديو في أون ذا ران ما كنتش مرتاحة وهنا الكلام رغم إنه ما فيهوش إساءة إلا إنه تحرش، البنت في الفيديو اللى تحت البنت تقبلته وكانت مرتاحة جدا وبالتالي لا يعتبر تحرش

تعليقات