في الأسبوع الأخير اتعلمت شوية حاجات جديدة وعرفت عن نفسي شوية حاجات جديدة:
اكتشافات:
1- أنا مدمنة تعلم أشياء جديدة ومافيش حاجة اسمها تبطيل 🤐
2- أنا مش الكائن اللي بيحب الاستقرار الدائم وبتخنق منه جدا.
3- أنا ما بعرفش ما ديش لحد معلومات يعدل بها حياته من غير ما يطلب.
4- ما بحبش المقارنة ما بحبش المقارنة ما بحبش المقارنة
5- ما بحبش الانانية لا من القريب ولا من البعيد ولما بشم ريحيتها مش بعرف اتعامل مع الاناني بروح صافية زي الأول.
6- أنا مش بثق في قدراتي.
7- مش بعرف أرسم حالي على حد حتى لو الموقف تطلب.
8- بعرف استغنى عن الاشياء المهمة بسهولة.
9- ما عنديش حاجة مهمة.
10- بتأثر بسرعة بالطاقة السلبية اللى في المحيط وكذلك الايجابية بس لو أتاثرت بطاقة سلبية مش سهل اني اتخطاها.
11- أنا عفوية بزيادة في مجتمع لا يصلح فيه العفوية.
اتعلمت:
1- الحاجات اللى بتعلمها في حياتي غالية جدا ومعلومات مهمة وبالتالي مش مضطرة اديها لحد ببلاش بس لو عملت كدا يبقا انا بتصدق بالمعلومة عشان ربنا يديني براح أكبر في عقلي للعلم.
2- قناعتي الشخصية لا يمكن تطبيقها على مجتمع متشكك ورافض يفكر بمعنى، ما ينفعش امشى بمبدأ "خيركم من تعلم العلم وعلمه" والناس اصلا مش فاهمة يعني ايه انت بتحاول تعلمها حاجة عشان تكون افضل منها " النية الصافية بتعتبر تعالي: مع الاسف!
3- ماينفعش اطول في نقاش ولا جدال مع حد حافظ مش فاهم الكلام معاه تضيع وقت وما ينفعش أعمل نفس الشىء مع حد مقتنع انه أفضل حد في الكون أو حد مقتنع أنه ديمًا أحسن منك لأن ده نقاش الجاهل وبالتالي مضيعة للوقت ومضيعة لمساحة الفراغ اللى في دماغك براحتك.
4- ماينفعش تفضي وقت لحد في عز الزحمة بتاعتك عشان يكون مبسوط ولا عشان هو مهم عندك لأنه في عز زحمته مش هيفتكرك اصلا ولو افتكرك هيفتكر إن زحمته أهم منك فهيعتذر أو هيتحجج بالزحمة.
5- مافيش حاجة اسمها حد قريب في حاجة اسمها احتياج "المصلحة" مصلحتي في اني اشكي لك همي دلوقتي عشان اوفر تمن الدكتور النفسى وبالتالي لما اخف واهدي احنا ما بقناش قريبين.
6- ما فيش صاحب بيتصاحب، ومش كل من اتقال عنه جدع جدع.. ايوة نصايح تكاتك.
7- مش كل حاجة ملكي ينفع تكون ملكك ولا العكس، بص على اللى في ايدك واللى بتعرف تعمله افضل عشان تعمر.
8- مش كل الكلام اللى بيتقال عنك صح "لا حلو ولا وحش" مش لازم يعني نصدق حد حلوة حالة الشك المذهبي الكوني بالحياة.
9- مش لازم نفخر بالحاجات البسيطة اللى بتبسطنا عشان غيرك ما بيملكهاش رغم بساطتها وبالتالي هتبدأ نظرية المؤامرة الكونية من حولك عشان تفقدها، خليها لنفسك أحسن
10- مش كل الناس ينفع تفكر معاهم في كل حاجة لأن مش كل الناس زيّ بعضها ولا كل الصحاب زيّ بعضهم يعني لو "زيد" هو الحد الاقرب ليك مش شرط كل حاجة تقولها له لا بحسن نية ولا بسوء نية. ممكن تقولها لعبيد عادي أحيانا بتحصل. من الاخر كدا احكي للحد اللى مهتم يسمعلك وما تحكيش مع الحد اللى مش فاضي يسمعلك.
11- فكر في نفسوك وخليك أناني وبلاش تكون عفوي لا تتعامل بحسن نية ولا بتواضع مع حد عشان الحقيقة اللى يقلل من شأنه يستحق اللى يجراله.
أزال المؤلف هذا التعليق.
ردحذفمقال رائع واعلمي ان جمال المرء في عفويته ..
ردحذف