الكلام محتاج براح..

في حد كتب إن الكلام أحيانا بيبقا تقيل ومش عايز يخرج ولا يتكتب.. لما فكرت هو الكلام ليه بيكون تقيل ومش عايز يخرج من الحلق وعامل زي الغصة لا بتنزل بلقمة عيش ولا بشوية مية؟

اكتشفت إن الخوف هو السبب..؟؟ احنا بنخاف نقول الكلام اللى جوانا لأسباب كتير ممكن نجمعها..

•  خايفين لا الكلام يكشفنا ويعرينا ومنلاقيش اللى يتحمل منظر الندوب الكتير اللى في جسمنا ولا شكل المصفى اللى على هيئة جسم ماشين به.
• خايفين نقول الكلام فيكون علينا مش لينا.
•  خايفيين نزعل حد عزيز، مع إنه لو عزيز مش المفروض يزعل من الكلام المفروض يفهم قصدك منه ويتعامل عليه، بس مش ديما العزيز بيفهم عشان احنا مختلفين واحيانا الاختلاف بيعمل خلاف.
•  أخيرًا للكلام مساحة براح، عشان يطلع ويكون له صدى محتاج ليها، مساحة البراح دي تتنافى مع الحدود والتابوهات، يعني لو أنت عندك حدود مع كل الناس تحت بند: "ذوق، أدب، اتيكيت ...الخ" الحدود دي ما بتكنش نفسها مع دايرة القربيين منك وبتختلف من شخص لتاني بمعنى، ما حدش بياخد دور حد في حياتنا وبالتالي ما ينفعش كل الكلام يتقال لكل الناس، ولا كل الكلام يتقال لشخص واحد بس.. 
• اشمعنى، لأن مش كل القريبين توأم روح، مش كل القريبين هيدوك نفس مساحة البراح اللى انت محتاجها لكلامك مش كل الناس هتفهم كلامك.. وع رأي كايروكي "كلامك ما بيتفهمش"، "احساسك ما بيتوصفش".. 
• وفر على نفسك الكلام اللى مش عايز يخرج وما تجبروش على الخروج لانه هيخرج لوحده لو شاف مساحة البراح اللى محتاجها...

#أهو_كله_كلام