أعتقد إني كان لازم اوفر فلوس التعليم اللى صرفتها دي، وفلوس الكتب اللى اشترتها وبقيت بنت تافهة عادية كان أفضل من إن إني أكون بنت معاها شهادات تتعلق على الحيطة بس...
ولما تيجي تسأل هو أنا اترفضت في الشغل ده ليه يكون السبب Unknown، او not related أو not good enough، على الرغم من إنك محقق كل اللى طالبينه لا ومقدم شهادات أعلى من المطلوب تثبت إنك مش بتهزر..
بس الحقيقة إني اكتشفت إن المشكلة في الغالب مش عندي، هي عند الناس اللى اعتادت الرفض لمجرد الرفض، واللى مش عايزة حد بيتحرك من مكانه في الشغل، ولا الإنسان اللى بيطور من نفسه، لإنه لمض وهيعمل مشاكل، وهو عايز المركب تمشي وخلاص عشان يفضل فيها ياخد فلوس مش يجيب حد ياخد مكانه..
ممكن ما تبقاش دي الصورة الحقيقة بس للأسف الرفض لسبب غير معلوم ده بيوصلنا للنقطة اللى فوق " انت مش عايز حد أفضل منك"..
بالتأكيد.. أنا ممكن فعلا أكون في وظايف كتير مش كويسة ولا مناسبة لها وقدمت لها غلط.. بس الواقع ديما مختلف.
زمان وأنا لسة عيلة في ثانوى قررت أشتغل واعمل خبرة عشان لما اتخرج ألاقي شغل على طول لأن عندي خبرة، وكان بردو الواقع مختلف.. يعني وقت ما اتخرجت كنت جمعت خبرة تسويق ومبيعات وإدارة وتنظيم وصحافة ودعاية وإعلان.. وفي الأخر كان أول شغل بعد التخرج بائعة في مكتبة...
مش بقلل من المهنة ولا أي مهنة بس بقلل من مجتمع ما بيقدرش لا علم ولا خبرة بيقدر بس الصحبة الحلوة...
أنهاردة بعد 15 سنة مرت على أول شغل ليا، أكتشفت إن التجربة اللى مريت بها دي مش انا لوحدي اللى مريت بها وإن في زيي كتيــــــــــــــــــــــــــــــــر، وأكتشفت أن حلنا هو الهجرة... مش إننا ندور على شغل ناخد منه فلوس ولا شغل يحقق أحلامنا أصل المعادلة ديمًا صعبة يا فلوس تسد الحاجة يا حلم وتعيش شحات إلا لو كان حلمك نفسه الفلوس!
تعليقات
إرسال تعليق